Ribeira vestiuse de gala para a estrea de “Operación Marea Negra”

Presentación de “Operación Marea Negra” en Ribeira

O Auditorio Municipal de Ribeira acolleu na tarde deste venres 25 de febreiro, con alfombra vermella e desfiles de estrelas, a estrea en Galicia da miniserie de televisión Operación Marea Negra, que se emite dende esta mesma xornada na plataforma Prime Video. Ao pase espacial, xunto co equipo desta co-produción galego-portuguesa liderada por Ficción Producciones e apoiada pola Xunta (cunha subvención de 250.000 euros), acudiron o conselleiro de Cultura, Román Rodríguez, o director de AGADIC, Jacobo Sutil, e o alcalde de Ribeira, Manuel Ruiz.

Tamén fixeron acto de presenza os produtores executivos Mamen Quintas e Julio Casal; os actores protagonistas, Álex González e Nerea Barros, así como Xosé Barato, Carlos Blanco, Iolanda Muíños e Manuel Manquiña, en representación do elenco galego da serie, no que figuran así mesmo Luis Zahera ou Miquel Ínsua.

Luis Zahera

Román Rodríguez felicitounos “polo gran nivel deste traballo” e lembrou que desta volta a plataforma internacional emite en exclusiva para España, Portugal e Brasil os catro episodios de Operación Marea Negra, que conta tamén coa implicación de TVG e doutras televisións autonómicas, así como de canles, produtoras e entidades do país veciño.

Operación Marea Negra está dirixida por Daniel Calparsoro e inspirada na historia real do primeiro narcosubmariño interceptado en Europa. Ambientada en novembro de 2019, conta as peripecias de tres homes que atravesan o océano Atlántico con tres toneladas de cocaína no interior deste semi-sumerxíbel de construción artesanal. O argumento ponnos de fronte con Nando, o responsábel de guiar o vehículo. Trátase dun mozo galego campión de España de boxeo amateur e mariño experto sen recursos económicos que se ve obrigado a buscar outros medios para gañarse a vida.

A serie está dividida en catro capítulos de 50 minutos de duración, dos cales proxectouse en Ribeira o primeiro episodio

Cómpre recordar que parte das escenas foron rodadas en diversas localizacións do municipio (como os portos de Aguiño, Palmeira e Santa Uxía) en xullo e agosto do ano pasado.

Liñas de apoio

Operación Marea Negra foi precisamente un dos 22 proxectos adxudicatarios en 2021 das subvencións para producións e coproducións audiovisuais de contido cultural galego, dotadas con 2,5 millóns de euros. Xunto con esta liña de axudas, a Xunta apoia de xeito “estábel e habitual” o sector a través das convocatorias para o impulso ao talento, desenvolvemento de proxectos e comercialización e difusión de obras audiovisuais, así como para festivais e salas de cinema.