Ribeira festexa o Día da Lingua Materna cun obradoiro de arrolos da man de Mamá Cabra

Co gallo de festexar o Día Internacional da Lingua Materna, que oficialmente se celebrará o luns 21 de febreiro, o Concello de Ribeira ten previsto levar a cabo o vindeiro sábado 19 de febreiro un obradoiro de arrolos co grupo musical Mamá Cabra. O dito encontro está pensado para nenas e nenos de 0 a 6 anos.

Os compoñentes de Mamá Cabra: Gloria Mosquera e Diego Maceiras interpretarán e ensinarán ás familias participantes neste pequeno obradoiro algúns arrolos cos que adormecer, aleitar e gozar da música nos primeiros días e meses de vida.

Engadir que a actuación terá lugar no Centro Cultural Lustres Rivas de Ribeira, sendo imprescindíbel facer reserva previa enviando un correo electrónico cos nomes e apelidos das persoas que van asistir así como un teléfono de contacto a: normalizacion@ribeira.gal.