Ribeira colabora coa expedición sanitaria galega que vai rumbo aos campamentos de Tinduf

O Concello de Ribeira vén de rubricar un convenio coa asociación Solidariedade Galega co Pobo Saharaui no ánimo de “colaborar financeiramente” a cumprir os obxectivos sanitarios da expedición que o pasado sábado partiu de Galicia rumbo aos campamentos de refuxiados de Tinduf. O acordo foi formalizado polo alcalde Manuel Ruiz e por Maite Isla en calidade da presidenta da citada asociación.

A través deste convenio, o Concello comprometeuse a abonar unha cantidade de 1.000 euros que irán destinados aos gastos sanitarios e calesquera outros necesarios para o labor que está a desempeñar a comisión, integrada por 147 persoas entre voluntarios, sanitarios, membros de organizacións políticas e colaboradores.

Son obxectivos do convenio, entre outros, garantir o dereito a saúde realizando os controis médicos pertinentes, garantir as necesidades fundamentais da poboación e facilitar a integración dos refuxiados dentro da sociedade galega tal e como se vén facendo a través do programa Vacacións en Paz dende fai dúas décadas.

Os campamentos de Tinduf, en Alxeria, nunha imaxe da organización ACNUR