A Policía Local de Ribeira informou da desaparición do veciño Manuel Pego Pego, residente no lugar de Deán, ao que se lle perdeu a pista ás 21.00 horas deste luns 14 de febreiro. Segundo explicaron os axentes, Manolo, de 74 anos, saíu este luns pola tarde da súa casa para dar un paseo e regresou á súa vivenda pero, polas razóns que foran, non chegou a entrar nela, posiblemente por atopala pechada e non ser quen de dala aberta, o que motivou que se desorientara.
Manolo Pego saíu da súa residencia con cazadora azul mariño, pantalón negro e gorra marrón. O dispositivo para localizalo mantívose activo durante toda a noite, unha vez que foi notificada a súa desaparición por parte dos familiares. Os labores de busca (levados a cabo polo Grupo de Emerxencias, a Policía Local e a Policía Nacional) centráronse sobre todo na contorna de Deán e nos lugares que percorría decote nos seus paseos.
