A Consellería de Política Social que dirixe a ribeirense Fabiola García comunicou o inicio das obras para renovar e mellorar o exterior da residencia de maiores pública autonómica da Pobra do Caramiñal. Estas actuacións afectan principalmente á fachada do edificio e irán encamiñadas á mellora da eficiencia enerxética e ás condicións de confort interior das persoas usuarias do centro. Os traballos foron adxudicados por un investimento de 374.000 euros.
En concreto, proxéctase a colocación dun sistema de illamento térmico exterior e a substitución de todas as carpinterías exteriores e interiores, así como da cuberta principal do inmóbel, á que se dotará dun sistema de illamento. O prazo de execución de todas estas actuacións será de dous meses e medio.
A Consellería de Política Social engadiu que nos vindeiros meses acometeranse neste edificio outras obras no interior para “adaptalo ao novo modelo residencial”, así como “melloras de acceso ao centro e mecanismos de control solar”. Con esta renovación integral o Goberno galego procura “unha renovación que permita ofrecer unha maior calidade de vida ás persoas usuarias”.
