O Servizo de Normalización Lingüística de Outes programou diversas actividades ao longo de toda a semana para conmemorar o Día de Rosalía de Castro (o 23-F) incluíndo unha exposición do alumnado do CEIP Plurilingüe de Outes na Casa da Cultura, poemas nos comercios, libros e flores de agasallo ás persoas que pasen pola Biblioteca e unha degustación do Caldo de Gloria.
As actividades comezan o día 22, coa inauguración da exposición de poemas de Rosalía ilustrados polo alumnado do CEIP Plurilingüe de Outes. A propia rapazada do centro educativo fará unha visita guiada e recibirá unha explicación didáctica, a cargo do técnico de normalización lingüística do Concello. Ademais de poder ver estes debuxos na Casa da Cultura até o 13 de marzo, haberá unha selección de debuxos e poemas que se colocarán nos escaparates de comercios e bares do municipio.
O día 23 de febreiro as persoas que se acheguen pola biblioteca poderán levar de balde un libro en galego e unha flor. Xa pola noite, e durante 15 días, poderá verse unha proxección dun poema de Rosalía na fachada da casa consistorial. Desde o SNL animan a que todas as persoas se tiren unha foto e a suban ás redes sociais con algún verso rosaliano.
O 24 de febreiro haberá tres pases teatrais no colexio de Outes para que a rapazada coñeza a vida e a obra de Rosalía dunha maneira amena e lúdica. Por último, como colofón das actividades para homenaxear á nosa autora nacional, o 26 e 27 de febreiro está prevista a degustación do Caldo de Gloria. Todas as persoas que tomen unha consumición nos locais Casa Amanda, John Turkey, O Taboleiro ou no Ruta de San Campio poderán degustar unha cunca do caldo.
