O PSOE de Galicia, a través do deputado Pablo Arangüena, urxiu ao Goberno galego a “dar cumprimento ao acordo parlamentario adoptado en maio do ano pasado, a instancias do PSdG, para rematar a ampliación e revisión da Rede Natura no prazo máis breve”. Nesta rede, como lembraremos, intégranse espazos da nosa comarca de gran importancia ambiental e paisaxística, como o Complexo Dunar e Húmido de Corrubedo, o Sistema Fluvial do Ulla-Deza, o Esteiro do Tambre ou o Monte e Lagoa de Louro.
“Nove meses despois”, censurou Arangüena, “non hai ningunha noticia nin indicio de que ese acordo se vaia cumprir”. E iso, dixo, malia que a Xunta xa anunciara a ampliación –que “deixara ultimada o Goberno de Emilio Pérez Touriño”- no ano 2011. Segundo dixo, dende aquela esa medida “quedou paralizada por razóns descoñecidas, pero por todos sospeitadas, durante unha década”. Ao seu parecer, trátase “dunha demora aínda máis grave” cando o propio Goberno galego recoñecía, nun anuncio no DOG de xaneiro de 2012, que esa ampliación era “urxente”.
Para o deputado, esta actitude resulta “aínda máis rechamante” tendo en conta que Galicia ten a Rede Natura máis pequena entre as 17 comunidades autónomas, “con menos do 12 por cento da súa superficie protexida sobre o papel fronte ao 20 por cento da seguinte comunidade, que é o País Vasco, e o 27 por cento da media estatal”.
Por outra banda, lembrou que, segundo a organización ecoloxista WWF, a rede natura galega, ten “o peor plan director entre as autonomías do Estado”. Tamén considerou “recomendábel” dinamizar os recursos e o patrimonio natural e ambiental dos territorios que sexan xa ou sexan declarados no futuro Rede Natura. Con este obxectivo, á vez que se procede a ampliar a Rede Natura, Pablo Arangüena propuxo “crear un fondo para compensar aos propietarios de terreos incluídos en Rede Natura e contribuír á mellora da economía desas zonas”. Ese fondo, sinalou, podería nutrirse “de recursos europeos, estatais, autonómicos ou incluso de empresas que queiran voluntariamente contribuír dentro da súa responsabilidade social corporativa”.
