Até 20 centros educativos galegos van participar nun programa autonómico para o fomento de orientacións vocacionais ceibes de estereotipos de xénero, poñendo o foco naquelas carreiras onde, xeralmente por ideas preconcibidas e prexuízos, hai menos presenza de mozas. Trátase do programa Edureferentes, unha innovadora iniciativa da Consellería de Cultura e Educación e Executivas de Galicia na que concorre, xunto con outros 19, o IES Félix Muriel de Rianxo. A través de Edureferentes mulleres destacadas en distintos sectores profesionais participarán en charlas e mentorías individualizadas nos colexios e institutos seleccionados.
A iniciativa está dirixida ao alumnado das etapas de Educación Secundaria Obrigatoria e de Formación Profesional Básica, para que teñan a oportunidade de coñecer novas referencias femininas no ámbito profesional.
O programa inclúe charlas e sesións prácticas nas que profesionais referentes galegas de éxito de diversos sectores achegaranse ás aulas para dar a coñecer a súa experiencia a través de encontros e mentorías individualizadas para potenciar as habilidades persoais dos alumnos. Trátase de sesións de 50 minutos onde o alumnado terá a oportunidade de traballar diferentes habilidades sociais e de comunicación baixo a supervisión destas mulleres referentes.
O departamento de Orientación de cada un dos centros adheridos ao programa será o encargado da súa coordinación.
