Esta semana fará recalada en Boiro o filósofo e escritor galego Ignacio Castro Rey, autor dunha das obras máis sobranceiras das nosas letras nas últimas décadas, Roxe de Sebes (Fundación Luís Seoane), ensaio poético a xeito de diario ou colección de haikus no que o autor documenta a súa particular viaxe existencial aos bosques do Courel (bebendo das fontes de Thoreau, Emerson e Uxío Novoneyra, e as grandes figuras literarias do nature writing).
Este 4 de febreiro Ignacio Castro estará no Centro Social de Boiro para presentar, na compaña do xornalista boirense (e amigo persoal de Castro) Gonzalo Trasbach, o libro Sexo y silencio. O acceso á presentación do libro, que está previsto para as 20.00 horas, será libre até completar a capacidade máxima da sala.
Ignacio Castro Rey é doutor en Filosofía pola Universidade Autónoma de Madrid, amais de crítico de cinema e arte, xestor cultural e profesor. Ademais de ser autor de múltiples artigos e conferencias e profesor convidado en distintas universidades, Castro Rey publicou diversos libros, o último deles chámase Lluvia Oblicua (Ed. Pre-Textos 2020), precedido de Mil días en la montaña (Ed. FronteraD, 2019).
