O Entroido de Noia comezou esta fin de semana con forza e todo indica a que o listón seguirá ben alto até o mércores 2 de marzo, que será cando culmine a axenda de actividades cun dos acontecementos máis sobranceiros e agardados: o Enterro da Sardiña. O Concello confirmou nas redes sociais que a Sardiña xa está exposta na Praza de Abastos antes de que, o vindeiro mércores, sexa queimada no Paseo Marítimo.
O programa arrincou este sábado 26 co concurso de disfraces para os máis cativos, cun photocall instalado no claustro do Consistorio a disposición de todas as crianzas participantes (que recibiron un agasallo pola súa implicación creativa na festividade do Entroido).
Amais do concurso de disfraces, o programa inclúe actuacións musicais (o pasado venres 25, cunha ruada da Charanga Vila de Noia a partir das 20.00 horas) e obradoiros de Entroido (o luns 28 no Claustro do Concello, entre as 17.30 e as 19.30 horas, e tamén o martes 1 de marzo no mesmo emprazamento e co mesmo horario). A axenda culmina o Mércores de Cinza, co Enterro da Sardiña. A vertente musical virá da man, o mércores, da Charanga Likor-K. A comitiva sairá ás 20.30 horas do Curro, en condución rápida até o Paseo.
