O Consello Superior de Investigacións Científicas (CSIC), a través do Instituto de Investigacións Mariñas con sede en Vigo, protagonizou este luns 14 un acontecemento histórico para o noso mar, a súa conservación e o aproveitamento sustentábel dos seus recursos. Estamos a falar da liberación (por vez primeira) de exemplares de polbos eclosionados en catividade e salvaxes e ceibados con emisores para estudar o seu comportamento. O proxecto levouse a cabo nunha zona do Parque Nacional das Illas Atlánticas. Foi liderado polo grupo de Ecoloxía e Biodiversidade Mariña do IIM. Os polbos (dous, un eclosionado en catividade e outro salvaxe) serán obxecto de seguimento ao longo dos vindeiros meses.
A acción é unha das tarefas contempladas no proxecto de investigación Ecoloxía do polbo común na natureza: resolver as súas incógnitas ecolóxicas para obter unha ordenación pesqueira e unha acuicultura sustentábeis (ECOSUMA), financiado polo Plan Estatal.
Iniciouse en xuño de 2020 e concluirá en 2023. Está liderado polo grupo de Ecoloxía e Biodiversidade Mariña e conta coa participación en tarefas de marcado de Ángel González, Santiago Pascual e Alex Alonso (equipo de investigación, ECOBIOMAR e Ecoloxía Pesqueira), ademais doutros investigadores.
“Con esta acción pretendemos estudar a ecoloxía espacial de polbos xuvenís e adultos no ámbito do Parque Nacional das Illas Atlánticas. Para iso, transportamos dous exemplares que foron liberados durante inmersións de mostraxe e en condicións controladas. Previamente, marcáronse mediante a colocación dun emisor acústico sobre un soporte específico situado na zona anterior do manto. É a primeira vez que se aplica esta metodoloxía no polbo común, aínda que se ten constancia de intentos anteriores. Para obter os datos dos movementos, empregaremos o conxunto de receptores acústicos despregados previamente na área de estudo no marco do proxecto TAC do grupo de Ecoloxía Pesqueira, financiado pola Fundación Biodiversidade”, explican Ángel González e Santiago Pascual, quen engaden que “ao redor de verán, esperamos obter os primeiros datos sobre o comportamento individual, uso do espazo e patróns de movemento destes dous exemplares de polbo marcados”.
Unha vez validado este sistema de marcado acústico aplicarase a mesma metodoloxía a outros exemplares salvaxes durante o verán. Por outra banda, os científicos investigarán durante os próximos meses as relacións tróficas do polbo común nas dúas fases críticas que, segundo lembran os investigadores, “producen unha gran mortalidade en condicións de cativerio”. Estas actividades, xunto co coñecemento das condicións ambientais que rexen todo o seu ciclo de vida, permitirán “avanzar cara a un enfoque ecosistémico para o manexo deste importante recurso”, comenta Ángel González.
