O Concello de Boiro e a Fundación Rosalía colaboran na conmemoración do Día de Rosalía (o 23 de febreiro)

O Concello de Boiro e a Fundación Rosalía acordaron colaborar para a organización das actividades do Día de Rosalía, que se conmemora o vindeiro 23 de febreiro. O alcalde, José Ramón Romero, e a concelleira de Cultura, María Outeiral, mantiveron unha xuntanza co presidente da Fundación Rosalía, Anxo Angueira. Na reunión tamén participou Xosé Luís Axeitos, director de Follas Novas, revista anual da dita fundación adicada monograficamente ao estudo da obra rosaliana e da cultura coetánea da autora.

O Concello de Boiro colabora coa edición deste ano, que se publicará coincidindo coa dita efeméride do 23 de febreiro.

No marco dos actos que o Concello de Boiro organiza para festexar o Día de Rosalía estará a presentación desta edición de Follas Novas e máis a plantación dunha figueira da horta de Rosalía.

A concelleira de Cultura, María Outeiral, falará máis polo miúdo das actividades que o Concello de Boiro organiza polo Día de Rosalía este mércores 9 de febreiro ás 13.00 horas na Sala de Comunicación do Concello de Boiro.