A concelleira do BNG en Muros, Maruxa Martínez, e da deputada de zona Rosana Pérez, compartiron a postura do seu partido a respecto da adquisición da fábrica de Calvo en Esteiro (Muros) que se debate este martes 15 de febreiro no Parlamento galego. A agrupación, tal e como se desprende das declaracións de Martínez e Pérez, propón a adquisición do devandito inmóbel.
O obxectivo, alén dos beneficios de dar continuidade á fábrica, sería apostar de cheo por xerar postos de traballo na ría, poñendo o foco no que segue a ser o gran piar económico da comarca: o mar. Segundo lembrou Rosana Pérez, as instalacións de Calvo en Esteiro (Muros) saíron a poxa pública no mes de decembro por un millón de euros, un proceso que quedou deserto, polo que “pensamos dende o BNG que a Xunta debera preocuparse polo inmóbel e por facerse con el”, e máis tendo en conta as posibilidades que ofrecen os seus 19.000 metros cadrados de superficie como elemento industrial e produtor de peche do ciclo pesqueiro e marisqueiro. Segundo lembrou Rosana Pérez, non existe na contorna da ría de Muros e Noia ningunha fábrica que achegue actividade no último elo da cadea do ciclo extractivo de peixes e mariscos.
