Medio cento de veciños percorreron a primeira etapa do Camiño A Orixe dende Corrubedo

Medio cento de veciños do municipio de Ribeira participaron este domingo 6 de febreiro nunha andaina pola primeira etapa do Camiño de Santiago de Barbanza, A Orixe.

O presidente da Asociación de Amigos do Camiño A Orixe, Manuel Mariño Nin, abriu o evento ás nove da mañá aos pés do faro de Corrubedo. Fíxoo debullando as particulares, atractivos e tesouros ambientais, culturais e paisaxísticos deste itinerario terrestre que acompaña a traslatio do apóstolo, cuxos restos entraron vía marítima pola ría de Arousa até o río Ulla.

A continuación os camiñantes iniciaron un traxecto de 16,7 quilómetros que os conduciron ata a Capela da Guía, en Carreira, tras atravesar diversos puntos de interese como o Outeiro de Santiaguiño, a Igrexa de Santa María de Olveira, o Dolmen de Axeitos ou o conxunto etnográfico dos muíños de Amendo. Entre os participantes atopábanse os concelleiros Juana Brión, María Sampedro, Víctor Reiriz, Ana Barreiro e Ramón Doval.

A intención é que en vindeiras fins de semana a medida que as axendas e o tempo o permitan realizar o resto de etapas aproveitando as fins de semana ata chegar á catedral compostelá.

Credenciais

Por outra banda, o Concello de Ribeira informou de que a nova Comisaría de Policía da cidade, emprazada no 21 da avenida das Airós (no lugar de Fontán, entre Martín e O Touro), expide xa as credenciais do peregrino imprescindíbeis para certificar o paso ordenado polos distintos núcleos e fitos da ruta xacobea. Pódense solicitar na oficina de denuncias.