A Garda Civil intervén 1.350 litros de gasóleo bonificado usado de maneira fraudulenta en Boiro
A Patrulla Fiscal e de Fronteiras da Garda Civil de Noia incautouse de 1.350 litros de gasóleo tipo B na localidade coruñesa de Boiro ao ser usado este combustible bonificado de maneira fraudulenta por unha empresa deste municipio.
Segundo informou o Instituto Armado, os feitos ocorreron por mor da localización dun vehículo industrial que facía uso fraudulento de gasóleo bonificado durante un control de carburantes nesa localidade.
As mesmas fontes indicaron que, #ante a “sospeita de que outros vehículos da empresa usasen fraudulentamente o mesmo tipo de carburante” e seguindo as ordes do xefe da Dependencia Rexional de Aduanas, os axentes procederon á inspección das instalacións da empresa titular do vehículo.
No transcurso da mesma os efectivos localizaron outro vehículo industrial con este tipo de gasóleo no seu depósito e dous depósitos interconectados, cunha capacidade de mil litros cada un, que contiñan entre ambos os 1.350 litros de gasóleo B.
Por iso, a Garda Civil procedeu á incautación do gasóleo tipo B atopado e á confección de tres actas denuncia por supostas infraccións á Lei 38/1992 de Impostos Especiais.
O gasóleo incautado quedou depositado nas instalacións da empresa ao dispor da Dependencia Rexional de Aduanas e Impostos Especiais.
