Dodro conmemora o Día de Rosalía con diversas actividades no Concello e no Pazo de Lestrobe

O próximo 23 de febreiro celébrase unha data de gran relevancia para a nosa cultura e a nosa historia: o Día de Rosalía. Os nosos concellos prepararon diversas axendas para celebrar a festividade, como por exemplo o de Dodro, un dos máis activos neste senso. Segundo comunicou a área local de Cultura, a axenda abrangue diversos actos a desenvolver na Casa do Concello (ás 17.00 horas) e no Pazo de Lestrobe (ás 18.00 horas).

Inclúese (na contorna do Consistorio) a plantación dunha figueira na honra da inmortal escritora ou a presentación da mostra Rosalía: obra poética e manuscritos, a cargo do presidente da Fundación Rosalía de Castro, o escritor veciño de Dodro Anxo Angueira. Máis tarde representarase o espectáculo A viaxe de Rosalía de Larraiz Urruzola Producións Artísticas (Rede Cultural da Deputación da Coruña) e levarase a cabo unha degustación do Caldo de Gloria (cortesía do Hotel Pazo de Lestrobe). Amais, durante todo o día servirase o Caldo de Gloria e o Café con Verso nos establecementos hostaleiros colaboradores da celebración (durante todo o día).