A compañía Malasombra Producións estará este venres 18 de febreiro en Boiro para representar o seu espectáculo infantil e xuvenil Os Fabulosos Cleaners. Será a partir das 20.00 horas na Casa da Cultura. A compra de entradas poderase facer o mesmo día da función a partir das 18.00 horas.
Trátase dun espectáculo con pompas de xabón para todos os públicos, en palabras de Malasombra “nha fantástica experiencia visual para participar toda a familia”.
O autor alacantino Luis Beviá, que percorreu medio mundo co seu universo xabonoso (Londres, Hong-Kong, México, Colombia, Perú, Cuba, Grecia ou Islandia, entre outros) dirixe a parte técnica deste espectáculo.
Argumento
Dous operarios da limpeza do teatro descobren por casualidade as posibilidades que lles ofrecen as súas ferramentas de traballo combinadas con auga e xabón. A partir de aí, os personaxes emprenderán unha excitante viaxe conducidos polas fantásticas pompas e burbullas.
ACTORES: Xoque Carbajal e Jouse García
AUTORÍA: Luis Beviá e Xoque Carbajal
DIRECCIÓN: Marcos Orsi e Xoque Carbajal
