Arrinca este sábado a axenda festiva do Son co Concurso Infantil de Disfraces

O Entroido xa hai días que se deixa sentir nos nosos concellos. Por exemplo en Porto do Son, onde o Concello confirmou “os primeiros recendos a filloas, melindres e orellas”, e onde elaborou un completo programa festivo para persoas de todas as idades e onde se fixo un esforzo especial para combinar e compatibilizar festa e seguridade sanitaria. Unha das actividades estrela será sen dúbida o Concurso de Disfraces e Comparsas do Entroido en Porto do Son, a través do cal vanse repartir 3.500 euros entre as veciñas, veciños que luzan as mellores galas.

O certame vén con dúas modalidades (para a rapazada e para os adultos) e un gran acto de culminación das actividades (o Enterro do Felipiño).

O concurso en si mesmo virá en dúas quendas.

A primeira quenda será este sábado 26 de febreiro, sábado, co Concurso Infantil de Disfraces. Establécense tres categorías: individual, parella ou grupo. Está previsto que actúe a Charanga O Santiaguiño de Padrón. Poderá participar a cativada de até 12 anos. O certame infantil desenvolverase na explanada portuaria de Porto do Son a partir das 17.00 horas.

A segunda quenda será a do Concurso de Adultos. Haberá tres categorías: comparsas, grupos e individuais. A saída do desfile está prevista para as 17.000 horas da Casa da Cultura de Porto do Son e até a explanada portuaria. A vertente festivo-musical virá da man de Troula Animación (co espectáculo Psychodelia) e da Charanga O Santiaguiño de Padrón.

Os premios en metálico entregaranse ao remate dos dous certames.

As actividades culminarán o 2 de marzo co Enterro do Felipiño. A ruada terá a saída as 19.30 horas da Casa da Cultura de Porto do Son. Percorrerá o viario da vila até o Tendedeiro.