Na mañá deste mércores 23 de febreiro a sede en Frións (Ribeira) de Ambar recibiu a vista dunha das representantes da Cooperativa Covirán na nosa comarca, Marisa Arnoso, encargada de Selección no Supermercado Etelvina de Aguiño, Ribeira.
Durante a xornada, compartiu a súa visión e experiencia tras case 40 anos en Covirán, lembrando que o establecemento foi fundado en 1983 e que resultou ser o primeiro supermercado en Aguiño e un dos primeiros de Ribeira. O eixe principal do encontro estivo centrado nas competencias laborais, poñendo o foco na importancia dos perfís polivalentes, dunha actitude positiva, da proximidade e dunha boa predisposición para o traballo en equipo. Tamén falou de emprendemento e do valor engadido do comercio local, facendo fincapé no impacto da COVID e na implicación do sector durante a pandemia.
Á xornada asistiron os e as alumnas da formación sobre industria alimentaria que a asociación de persoas con diversidades funcionais ou cognitivas está a impartir nas súas instalacións, grazas ao financiamento da Fundación Once, no programa Uno a Uno do POEJ convocatoria 2021-2022 e o Fondo Social Europeo, que ten a finalidade de “promover a sustentabilidade e a calidade no emprego, favorecer a mobilidade laboral, así como reforzar a empregabilidade e as competencias profesionais das persoas novas e non integradas nos sistemas de educación ou formación”.
Tamén estiveron presentes en representación de Ambar: Milagros Rey, presidenta de Ambar; Daniel Tojo, orientador laboral; e Ángeles Sampedro, técnica de emprego.
Esta foi a segunda xornada dun ciclo de conferencias con empresas que Ambar comezou á semana
pasada coa visita de Flavia González, técnica de Selección de Persoal de Galicia e Asturias da multinacional Clece. O ciclo proseguirá nas vindeiras semanas.
