A Pobra fortalecerá o seu Coworking con apoios directos á xestión, ao espírito emprendedor e á igualdade

A mediados do mes de febreiro o Coworking da Pobra do Caramiñal pasou a integrarse na Rede Provincial de Espazos de Traballo Colaborativo. Segundo explicou este luns 28 de febreiro a edil de Promoción Económica, Charo Varela (Nós Pobra), continúanse dando pasos adiante con relación a este centro, que actualmente conta con 5 iniciativas activas, polo cal as próximas propostas que se van desenvolver fundaméntanse en tres piares: apoio na xestión por parte dunha asistencia técnica; fomentar o espírito emprendedor; e dinamizar o propio Coworking.

Indicou que tamén se impulsará un campus de emprendemento con perspectiva de xénero (constará dun programa formativo e unha visita didáctica) e a promoción do sector primario para o aproveitamento dos excedentes agrarios en explotacións familiares de autoconsumo, o cal xa se iniciou na localidade. O custo total do proxecto ascenderá a 31.014’50 euros, dos cales a Deputación da Coruña achegará un 80% e o Concello asumirá a contía restante.

En representación de Promove, a empresa que se encargará da asistencia técnica, Fátima Rodríguez manifestou que se ofrece “un enfoque integral” das distintas actividades previstas. Ofrecerase un apoio ás e aos coworkers; tanto a aquelas/es que se atopan en fase de preincubación coma ás que xa están dadas de alta e que encaran os tres primeiros anos de consolidación no mercado. Brindaranse titorías e compartiranse e canalizaranse aquelas necesidades e propostas que presenten.

Así mesmo, poranse en marcha charlas para estimular o espírito emprendedor na localidade ao tempo que se promociona o espazo de traballo colaborativo, así como titorías e xornadas de portas abertas.

O alcalde, Xosé Lois Piñeiro (Nós Pobra), salientou que o Coworking pobrense “é un dos primeiros que houbo en Galicia de iniciativa pública” e que xa deu os seus froitos, pois indicou que xa foron varias as empresas que se crearon no espazo colaborativo para logo independizarse e lanzarse de cheo ao mundo da competencia empresarial. Agradeceu, ademais, á Deputación a incorporación deste centro á rede provincial.

Creado en 2017, o Coworking pobrense consta dunha área de 143’23 metros cadrados con capacidade para acoller 10 iniciativas emprendedoras: o espazo Emprende, con cabida para 8 módulos de traballo e destinado preferentemente a persoas emprendedoras que desexen crear a súa propia empresa, e o espazo Nómades, con 2 módulos dirixido a persoas usuarias externas que non permanezan de xeito continuado no centro.