A Comunidade de Montes de Nebra organiza este sábado unha xornada de poda de froiteiras

A Comunidade de Montes de Nebra (Porto do Son) vén cun febreiro cargado de actividades. Na axenda, a xeito de introdución, figura unha xornada de poda de froiteiras. Será o sábado 26 de febreiro, contándose para o desenvolvemento da actividade coa presenza dun profesional que achegará consellos e técnicas para realizar o tratamento e o coidado das árbores do mellor xeito posíbel, “tanto dende un punto de vista teórico como práctico”, sinalan dende a Comunidade.

A vertente teórica será pola mañá, entre as 10.30 e as 13.30 horas, no local da Comunidade de Montes. Logo será a quenda do xantar e o traballo retomarase pola tarde coa vertente práctica do mesmo, a partir das 15.00 horas, cunha saída á plantación de maceiras do Curro.

A xornada será aberta a todo o público, pero dende a organización recomendan ás persoas interesadas non esquecer a reserva de praza a través do teléfono 659 060 548, xa que o número de persoas que poden participar é limitado.