Un ciclista resultou ferido en Boiro tras sufrir unha caída nunha zona de monte

O ciclista circulaba ao seu paso por Lampón, en Boiro, por unha zona de monte que presentaba dificultades de acceso para o vehículo sanitario.

O accidente ocorreu sobre a unha deste mediodía. Foi un particular quen chamou ao 112 Galicia para informar da caída dun ciclista. Aseguraba se trataba dun lugar de difícil acceso para a ambulancia.

Por iso, ao contactar co persoal do Servizo de Urxencias Sanitarias de Galicia-061, indicaron que o helicóptero medicalizado con base en Santiago de Compostela se desprazaba, neses intres,  cara o lugar. De feito, a aeronave tomou terra no centro de saúde da localidade.

Finalmente, o vehículo sanitario puido chegar ata onde se atopaba o ciclista ferido, que o trasladou ata o centro de saúde e onde o agardaba a aeronave.

Ademais de informar do suceso ao persoal sanitario, os xestores do 112 puxeron os feitos en coñecemento dos Bombeiros de Boiro, da Garda Civil, da Policía Local e dos efectivos do Servizo Municipal e da Agrupación de Voluntarios de Protección Civil da localidade.

Dotación de bombeiros do Consorcio Provincial Contraincendios e Salvamento da Coruña con base en Boiro ven de actuar xunto SMPC Boiro, Policía Local de Boiro, RTSU Rianxo e médicos do Pac en atención de accidente ciclista nos montes de Lampón, preto de Montañó no Concello de Boiro.