Suma Ribeira volve poñer o foco no proxecto do novo Auditorio e fala de desaxustes orzamentarios

A agrupación Suma Ribeira emitiu un comunicado crítico co balance de proxectos levado a cabo polo Concello os días pasados, máis en concreto co proxecto de novo Auditorio Municipal, a día de hoxe en fase de construción. No mesmo SR lamenta que o propio alcalde, Manuel Ruiz, lle dea agora a razón a este grupo sobre o orzamento para equipamento, que vai precisar dunha dotación maior á prevista, cando menos do dobre, segundo SR.

A plataforma cidadá que coordina Xurxo Ferrón volveu mostrar a súa preocupación respecto da “situación xerada co Auditorio”, principalmente polo “gasto desproporcionado que vai supor ás arcas municipais respecto do suposto orzamento inicial de dous millóns e medio de euros que, polo de agora”, critican, “xa ascende a máis de catro millóns e ao que hai que sumar un novo capítulo co desaxuste na previsión do seu equipamento”, sinala o grupo Suma Ribeira.

A plataforma engade que no pasado pleno votou en contra dun crédito extraordinario de 75 mil euros para complementar a subvención da Deputación por importe de 300.000 euros, co que se faría fronte aos gastos de maquinaria, iluminación, etc, da nova infraestrutura, por “ser unha cantidade claramente insuficiente para as necesidades reais do Auditorio”. Na súa intervención, Xurxo Ferrón asegurou que “sendo austeros, o orzamento real do equipamento iría ao dobre desa cantidade, cando menos 750.000 euros”, e explicou “que o propio preámbulo do proxecto recollía xa esa realidade, recoñecía eufemisticamente que a previsión feita non sería suficiente”.