O Concello de Ribeira adxudicou actuacións en 2021 por valor de once millóns de euros

O Concello de Ribeira comezou o ano compartindo un balance dos proxectos iniciados, asinados ou levados a cabo en 2021, no que adxudicou actuacións por valor de 10.923.368,78 euros. Este traballo realizado, explicaron fontes do Goberno local, “reafirma o municipio como un dos máis inversores en obra pública de toda a xeografía galega”.

Os diversos procedementos de contratación impulsados traducíronse nun total de 71 expedientes adxudicados entre o 1 de xaneiro e o 31 de decembro de 2021.

A construción do Auditorio Municipal (3.977.964,69 €, financiada con fondos propios, fondos europeos FEDER e a Xunta de Galicia) e os servizos de explotación e mantemento durante tres anos das depuradoras de Couso e Corrubedo (3.368.919,15 €) foron as adxudicacións cun importe máis elevado.

Entre as contratacións figuran tamén outras iniciativas coa mesma vocación de servir á cidadanía de todo o municipio como o novo apeadoiro da estación de autobuses (284.707,00 €), a implementación de melloras en Administración Electrónica (283.633,32 €) ou a redacción dos tres plans para o futuro polígono industrial (proxecto de expropiación, servizos arqueolóxicos e proxecto de urbanización) por un montante global de 199.526,58 euros.

Xa cunha menor contía inclúese a contratación da roza dos camiños públicos (13.161,17 €) como complemento ao traballo da brigada municipal, ou a recente instalación de novos puntos de luz de 37 lugares do municipio para reforzar a rede de iluminación exterior (39.997,61 €).

Respecto do traballo realizado nas parroquias, o Concello destaca que máis dun millón e medio de euros (en concreto, 1.531.023,66 €) estiveron destinados a melloras nos servizos e infraestruturas nas oito parroquias do municipio distintas á capital Santa Uxía. Trátase de 38 actuacións como a última fase do Centro Social de Carreira, retomada hai dúas semanas; a instalación de saneamento en Agrelo, o parque infantil do Colexio de Artes, a pavimentación da estrada de Bretal a Reiriz en Olveira, a renovación de servizos na rúa do Vilar en Palmeira, a renovación da rede de abastecemento na Mámoa (Carreira), a segunda fase da dotación de beirarrúas e pluviais na Ameixida (Castiñeiras), o acondicionamento do entorno do Conservatorio de Aguiño, a segunda fase das beirarrúas en Gándara (Oleiros), a pavimentación dun camiño en Sego (Artes), a renovación de servizos na rúa das Américas (Aguiño), a pavimentación dun camiño na Gándara (Artes), a renovación de servizos no Falcato (Corrubedo) ou a renovación da liña de abastecemento nun tramo da estrada DP-7305 ao seu paso por Carreira, entre moitas outras.

No que se refire á cidade de Santa Uxía, o Goberno local salienta 13 intervencións similares como a renovación de servizos e pavimentación na avenida da Coruña, a pavimentación con plataforma única de Romero Ortiz, a pavimentación da praza da Amarella, a renovación de luminarias nas rúas de Lugo, Rosalía de Castro e Galicia; a instalación de pluviais nun camiño de Deán Grande, a ampliación da rede de auga potable na rúa Agro da Area, o subministro de madeira e parafusos para a renovación do paseo de Coroso ou a renovación da liña xeral de abastecemento no parque García Bayón. Suman un total de 617.936,47 euros.

Consonte co anterior, o investimento por habitante en obras nas parroquias ascende a 113,40 euros/habitante, mentres que en Santa Uxía de Ribeira é de 45,77 euros/habitante.

Unha vista das obras do novo Auditorio Municipal