Este luns, a Corporación municipal de Ribeira debaterá a proposta da alcaldía para nomear a Manuel Ayaso, fillo Predilecto, e existe ademais un proxecto para constituír a Fundación Manuel Ayaso, que se encargaría de custodiar e difundir o seu extenso e valioso legado artístico.
Manuel Ayaso Deus naceu en Aguiño o un de xaneiro de 1934 e emigrou a EEUU aos trece anos, levando unha formación básica e un mundo de tradicións galegas que caracterizarían o seu mundo pictórico.
Alí obtivo unha bolsa na Escola de Newark (1953-1956), onde se aproximou ao debuxo, a pintura, a cerámica e a escultura. Nacionalizouse americano e incorporouse ao Terceiro Exército dos Estados Unidos en Atlanta, no que se ocupou do deseño de obras de teatro e baile.
O Centro de Oficiais, con coñecemento do seu talento, asignoulle un estudo propio no que xurdiron as súas primeiras obras, que vendeu na Nova Galería de Nova York.
En 1959 realizou a súa primeira viaxe a España, e na súa visita ao Museo do Prado achou referentes e influencias para o seu traballo (Goya, Picasso, O Bosco, Leonardo…). Un ano máis tarde regresou a Estados Unidos e comezou a traballar coa prestixiosa galería neoiorquina Cober Gallery, obtendo o Premio Trubeck do Monclair Art Museum. En 1963 foi bolseiro pola Fundación Tiffany, o que lle permitiu residir durante ano e medio en España e aproveitar para empaparse do universo artístico do Museo do Prado. Ao seu regreso foi fichado pola Forum Gallery, a súa actividade expositiva viuse intensificada nas décadas dos 70 e 80 e empezou a expoñer en importantes cidades de EEUU e Canadá.
Ao longo da súa traxectoria a súa obra incorporouse a destacados museos, así como a distintas fundacións privadas de EEUU, España, Israel, México e Sudáfrica.
Son moitos os museos que contan con obras súas: o San Francisco Museum of Modern Art, o Museo de Arte Moderna de Nova York ( MOMA), o Whitney Museum of American Art, o Crystal Bridges Museum of American Art de Bentonville, o Worcester Museum, The Pennsylvania Academy of the Fine Arts, o University of Oregon Museum of Art, The Arkansas Arts Center, o Monclair Art Museum, a American Israel Foundation, The Slaten Memorial Museum, a University of Massachusetts, a Illinois Wesleyan University, The Butler Institute of American Art, o Centro de Arte Contemporánea (Compostela) e, por suposto, o Museo do Gravado de Ribeira e a casa da cultura de Aguiño.
Tecnicamente utiliza colaxe, frottage, guache, plumilla e lapis de cores. Nos 70 comezou a empregar a técnica de punta de prata.