O alcalde de Rianxo, Adolfo Muíños, deberá remodelar o seu Goberno de coalición co PSOE tras a dimisión da edil do Bloque, Adelina Ces Quintáns, que xestionaba as concellerías de Educación e Normalización Lingüística.
A edil dimisionaria que alegou motivos persoais entrou na Corporación en 2002 e cinco anos despois foi candidata nos comicios locais e en 2011 entrou a formar parte do Goberno de Muíños.
O mandatario rianxeiro dixo que a substituirá a persoa que ocupaba o seguinte posto na lista electoral, Xosé Vázquez, veciño da parroquia de Isorna, e que nos próximos días tratará o alcance da remodelación que deberá facer no seu executivo.
A renuncia de Adelina Ces será o primeiro punto a tratar no pleno extraordinario convocado para este mércores ás oito da tarde.
