O Grupo Municipal Socialista de Noia anunciou que vai solicitar ao Goberno local que parte dos fondos que o Concello percibirá a través do Plan de Obras e Servizos da Deputación sexan para “mellorar a accesibilidade no termo municipal e arranxar instalacións que actualmente están perigosas”. Dende a agrupación consideran “prioritario” eliminar barreiras arquitectónicas que “seguen a prexudicar as persoas con mobilidade reducida” que están presentes “en espazos públicos, edificios, pasos de peóns, etc”.
Ademais de para mellorar a accesibilidade, os socialistas propoñen que se leven a cabo labores de mantemento en instalacións que están “bastante deterioradas actualmente” para “mellorar a seguridade en lugares moi concorridos, como son os elementos de madeira no paseo marítimo, tanto na zona de Barro como de San Lázaro, principalmente, e tamén no paseo de Boa”.
O voceiro Roberto Iglesias indica que “para o G. Municipal do PSdG-PSOE, conseguir unha vila accesíbel debe ser unha prioridade inmediata para que non haxa cidadáns que non podan facer uso dos servizos de Noia e non se sintan atendidos na súa propia vila”. Outra prioridade, engade, “debe ser a seguridade nas instalacións municipais, que por unha falla de mantemento evidente poden ser un perigo para as persoas”.
