Os Reis Magos de Oriente participarán este mércores 5 de xaneiro nun acto de recepción e benvida na Casa da Cultura de Lousame, unha actividade que segundo confirmou o Concello seguirá o mesmo procedemento de seguridade sanitaria e control que o ano anterior. Así, durante esta recta final de ano déuselle á veciñanza de Lousame a posibilidade de escoller a hora de visita á recepción real de forma gratuíta a través de bandoticket.
A recepción terá lugar en quendas de 10 minutos entre as 10:30 e as 14:00 horas e de 16:00 a 19:00 horas. As familias entrarán por unha das portas do auditorio e, despois de estar os seus dez minutos cos tres reis magos, sairán pola outra porta do auditorio, de forma que non haberá contacto entre os distintos grupos familiares.
