O Viveiro de Empresas de Ribeira comezou o novo ano en curva ascendente de crecemento. Fíxoo, en concreto, sumando unha nova incorporación que se suma as outras dúas que se estableceron no pasado outono e a outra entidade xa instalada con anterioridade, o que, en palabras do Concello, “afianza este servizo como incubadora de proxectos innovadores de emprendemento local”. A nova empresa chámase Upskill English e vén da man da tradutora e profesora de inglés María Fernanda Gómez Amenós, que imparte clases de inglés xeral e especializado, apoio escolar, preparación de exames oficiais ou conversas, tanto online como presencialmente no inmóbel.
O Concello lembra que nos últimos catro meses tamén se instalaron dous gabinetes de psicoloxía (Álvarez Psicólogos e Psico Balance) e que tamén está radicado dende finais do 2020 o Centro Tecnolóxico do Barbanza, sociedade cooperativa dedicada ao desenvolvemento de software, páxinas web e solucións integrais e novas tecnoloxías.
Entre as vantaxes do Viveiro, situado no lugar de Fafián, atópanse a accesibilidade de uso, os prezos ao alcance do empremento local e máis un servizo permanente de formación e asesoramento.
O Concello recorda as dúbidas sobre este servizo poden resolverse a través do Servizo de Orientación Laboral mediante teléfono 981 871 497 ou ben acudindo presencialmente ao Viveiro.
Dende a súa apertura xa pasaron novos profesionais pertencentes a sectores como a consultoría, os idiomas, a imaxe e son, a xestión deportiva, a nutrición, a tecnoloxía ou a mercadotecnia dixital.
