O vindeiro sábado inaugúrase en Outes unha mostra que reivindica a creación de seleccións galegas en todos os deportes

O vindeiro 5 de febreiro, sábado, a Casa da Cultura de Outes vai acoller a inauguración da mostra Galiza, un Pobo, unha selección, co-organizada por ACC Terra Outes. A exposición, cuxa apertura está fixada para as 12 do mediodía, vén da man da plataforma Vía Galega e forma parte da campaña coa que pretende reclamar seleccións galegas en todos os deportes, “con dereito a participar a nivel oficial e internacional, así como que os e as nosas deportistas podan competir baixo a bandeira galega e exhibila cando soben ao podio, sen esquecer a necesidade de galeguizar o deporte”.

A continuación, no salón de actos proxectarase un documental coa participación de diversas personalidades relevantes e representativas do deporte galego no que verten a súa opinión sobre o dereito, o interese e a necesidade de poder competir representando á nosa terra, oficialmente, en todas as disciplinas deportivas.

No acto intervirán Anxo Louzao, coordinador da campaña, Jano Sanmartín, seleccionador galego de futbol gaélico, e Xoán Mariño, presidente da asociación organizadora.