O pasado xoves 27 presentouse no salón de plenos do Concello de Dodro o programa deportivo Dodro Saudable. Trátase dun ambicioso plan de actividade dirixido á poboación en xeral, dende “a infancia a vellez, pasando pola etapa adulta”, que inclúe todo tipo de propostas para mellorar a calidade de vida da cidadanía a través da actividade física. O programa atenderá as características, demandas e necesidades de cada persoa participante.
O Concello apoia a posta en marcha deste proxecto na necesidade de incrementar os hábitos saudábeis a todos os niveis, uns hábitos que empeoraron coa chegada da pandemia e o confinamento: “Os datos aportados por organizacións privadas como a Gasol Fundation, e de públicas como a OMS ou a Xunta de Galicia co seu programa DAFIS, amosan un preocupante abandono da condición física que se traduce nun empeoramento da saúde persoal”, sinalaron dende o Consistorio.
O Concello de Dodro a través do departamento de Deportes deseñou este programa gratuíto que está a disposición de toda a veciñanza coa finalidade de mellorar a súa saúde.
A presentación está a disposición da veciñanza través da canle municipal en Youtube.
Segundo se fixo saber, a orixe do proxecto está en 2019, cando o técnico deportivo municipal (Fernando González Ares) e a área de Deportes decidiron enfocar a programación deportiva local cara o ámbito da saúde, baseándose nos beneficios máis que comprobados da actividade física para mellorar a calidade das persoas. Isto que é aplicábel a calquera territorio, ten aínda máis sentido en concellos de poboación envellecida como o de Dodro, onde todo indica a que nos vindeiros anos seguirá cobrando maior peso a franxa de idade dos maiores de 65 anos. A este factor hai que engadir as consecuencias da pandemia, que reduciron as posibilidades de realizar calquera tipo de deporte.
