As recentes intervencións levadas a cabo por Portos de Galicia na contorna do peirao de Palmeira seguen a traer cola. Sen ir máis lonxe, o Partido Barbanza Independente (PBBI), a través do portavoz e concelleiro Vicente Mariño de Bricio, vén de presentar unha moción para ser debatida no pleno da Corporación relativa aos devanditos traballos de acondicionamento. Na moción, o PBBI faise eco das queixas do veciños sobre as obras realizadas, uns traballos “consistentes na instalación duns bancos de pedra granítica e bolardos metálicos que dificultan a circulación e a accesibilidade nesa zona, na que tamén queda imposibilitado o aparcadoiro que existía desde hai décadas”, sinala a agrupación, explicando que a “intervención xera unha problemática que afecta a veciños, a visitantes e á hostalaría da zona, que desde hai un tempo xa se está vendo moi prexudicada polas restricións derivadas da situación epidemiolóxica pola pandemia da COVID”.
O PBBI di que cómpre volver ao estado orixinal e tacha o proxecto de “improvisado”, e de ter sido desenvolvido “á marxe dos veciños”. O móstrase crítico con Portos de Galicia (“coa conivencia do Concello de Ribeira e o seu equipo de Goberno”), que, segundo opinan, “volveu sucumbir ao feísmo ao que xa nos ten moi afeitos ao longo e ancho da nosa xeografía”.
Nun plano máis concreto, o PBBI di “compartir a opinión da veciñanza” no que respecta ao que cualifican de “labirinto a modo de serpentina en que se converteu o porto de Palmeira, coa colocación do os bolardos metálicos e bancos de pedra”. Tamén critica que “se creara un problema de aparcadoiro onde antes non o había, co considerábel prexuízo a diferentes sectores incluíndo a veciños e visitantes”. E todo isto, engaden, “implicou un custe importante, habendo outras opcións para gastar no porto como podería ser o mantemento de varandas, peirao, limpeza, etc”.
Por todo iso, desde o PBBI solicitan os seguintes puntos:
1- “Que se proceda ao inmediato restablecemento ao seu estado orixinal da obra executada no porto de Palmeira, eliminando os actuais bancos de pedra e os numerosos bolardos metálicos”.
2- “Instar a Portos de Galicia á reparación das balaustradas de todo o recinto portuario, así como do peirao”.
3- “Que se proceda á limpeza de ramplas e das rúas adxacentes, eliminando verdellos e outras sucidades adheridas ao pavimento”.
