O Pavillón Deportivo Municipal de Dodro é este mércores 5 de xaneiro o epicentro da actividade abeirada á visita dos Reis Magos ao termo municipal. A actividade focalizarase alí a partir das 17.00 horas, co fin de ofrecer un acubillo contra as inclemencias do tempo ao mesmo tempo que se garante, polas dimensións e estrutura do inmóbel, a seguridade sanitaria de todas as persoas que acudan á recepción das Súas Maxestades.
Segundo confirmou o Concello, o programa vai máis alá dunha simple estadía de Melchor, Gaspar e Baltasar: haberá animación musical, mascotas infantís, malabares, agasallos, lambetadas e chocolate con churros.
