O BNG de Noia vén de facer públicas as súas propostas ao Goberno local para seren incluídas nos investimentos para o POS+ 2022 da Deputación de A Coruña, unha listaxe de proposicións que representa, en palabras do grupo, “unha aposta por comezar a poñer en marcha os investimentos que contempla o Plan Director de Saneamento de Noia, o cal foi culminado o pasado 2021 por Augas de Galicia”.
O portavoz da formación, Ricardo Suárez, sinala “a necesidade de que todas as administracións aporten o seu gran de area na consecución dun plan tan importante como o Plan Director”, e apunta que “os fondos achegados pola Deputación no Plan de Obras e Servizos poden ser unha vía óptima de financiamento para poñer en marcha a mellora dos bombeos de A Barquiña, que son sinalados no plan como unha das actuacións máis importantes para a mellora da rede de saneamento noiesa”. Neste sentido, os nacionalistas propoñen unha achega de 388.000 € para a EDAR da Barquiña.
Dende o BNG din sentirse decepcionados co PP por unha decisión que pon de manifesto “o seu rexeitamento a investir na actualización e mellora da EDAR de Noia”, unha petición que os nacionalistas incluían nas emendas aos orzamentos do Executivo galego, mais aseguran que seguirán insistindo para “conseguir que a Xunta mude a súa postura e finalmente se poda realizar este investimento prioritario durante esta anualidade”.
Neste sentido Suárez afirma que a consecución da mellora da EDAR de Noia e a actualización dos bombeos da Barquiña significarían “amosar á cidadanía un compromiso dos distintos partidos políticos da intención de progresar na consecución da mellora dun saneamento que a día de hoxe funciona dun xeito moi deficiente”.
Alén deste investimento, as propostas do BNG para seren incluídas no POS+ 2022 inclúen a instalación dun elevador na Biblioteca Municipal de Noia. Suárez considera “que este investimento é imprescindíbel” porque o feito de que un servizo básico como a biblioteca presente barreiras para determinados colectivos “é algo inadmisíbel en 2022”.
Por último, o BNG tamén reafirma o seu compromiso coa loita contra a fenda dixital e propón o lanzamento dunha convocatoria de axudas para a adquisición de equipamentos informáticos para o alumnado noiés, para o cal inclúen 77.000 € que serían financiados a través do POS social da Deputación de A Coruña.
