A deputada socialista Noa Díaz estivo este luns 24 de xaneiro en Rianxo reivindicando a posta en marcha do servizo de Hospitalización a Domicilio (HADO) no concello ao longo do primeiro trimestre de ano, “tal e como se acordou no Parlamento de Galicia”. Díaz dixo que “non se pode consentir” que o SERGAS adíe a implantación deste servizo, “mantendo a discriminación ás persoas doentes do termo municipal e ás súas familias” máis alá do límite temporal marcado pola Cámara autonómica.
A visita ao concello rianxeiro (na que Díaz reuniuse coa voceira socialista local, Mari Carmen Figueira) complementouse coa achega no Parlamento dunha batería de iniciativas encamiñadas aos mesmos obxectivos.
Noa Díaz dixo que “a Comisión de Sanidade respaldou por unanimidade o pasado mes de decembro unha proposta socialista na que se marcaban os tres primeiros meses de 2022 como límite temporal para que o HADO chegase a toda a área sanitaria de Santiago e Barbanza, incluíndo por fin ao concello de Rianxo”. A parlamentaria do PSdeG alertou “de que o SERGAS está a ampliar ese horizonte temporal nas respostas ás reclamacións que está suscitando a veciñanza do municipio individualmente a través da plataforma de queixas”.
Noa Díaz afirmou que “non se pode consentir que, xusto un mes despois de que se aprobase a proposta socialista por unanimidade, o SERGAS estea dicindo que a previsión é facelo no primeiro semestre”, e máis despois de terse comprometido a “facelo no primeiro trimestre”. Segundo dixo, “nin as persoas doentes de Rianxo nin as súas familias poden soportar máis tempo a discriminación asistencial, á que dende o grupo socialista non lle atopamos sentido nin dende logo ningunha motivación”.
A deputada socialista criticou o “prexuízo” que Servizo Galego de Saúde está a causar no concello, o que motivou, lembrou, a posta en marcha do movemento HADO para Rianxo, HADO para todos, co obxectivo de reclamar unha solución urxente a esta eiva asistencial. Porén, engadiu, “a situación é máis grave tendo en conta que o propio presidente da Xunta asegurou en 2019 asegurou que o HADO estaría implantado en todo o territorio galego en 2021”. Díaz recordou ademais que o Plan Galego de Hospitalización a Domicilio fixaba 2023 “como data para chegar a toda a poboación galega, pero xa sobrepasado o ecuador do programa na actualidade existen diferenzas entre as áreas sanitarias do país”, dixo, engadindo que mentres algunhas xa teñen a implantación completa, na de Santiago e Barbanza limítase a unha área de 25 quilómetros da unidade, deixando fóra a Rianxo.
