Sen éxito concluíron as dúas inmersións que o Grupo Especial de Actividades Subacuáticas ( GEAS) da Garda Civil realizou este mércores en Porto do Son. Ambas na zona onde a finais de novembro un barco pesqueiro achou unha costela que o último informe forense indicou esta semana, con case total probabilidade, que pertence a Xabier Furtado, mozo que desapareceu no verán do 2020 xunto a Miguel Quan tras envorcar o kaiak no que navegaban.
A compañía de Noia da Garda Civil volveu solicitar a presenza dos mergulladores, cuxa primeira inmersión arrincou ao redor do mediodía, concluíndo sobre as 14.00. Centráronse no punto onde o barco pesqueiro marcaba o achado, situado enfronte da praia de Caveiro aínda que no interior da ría de Muros-Noia.
As correntes dificultaron os labores do GEAS, que tamén exploraron o resto do roteiro que marcaran e seguiran os mariñeiros aquel 30 de novembro, ampliando así a procura aínda máis.
O equipo de mergulladores, formado por catro profesionais, regresou de tarde, concluíndo a segunda inmersión ás 17.30 co mesmo resultado.
A investigación segue en mans da Policía Xudicial da Garda Civil da Coruña, que esta mesma semana remitiu ao xulgado de Noia que instrúe o caso o último informe forense, emitido polos expertos do propio instituto armado.
