Miguel Anxo Seixas estará este sábado en Rianxo para achegarnos a vida de Castelao entre 1922 e 1947

Este sábado 22 de xaneiro, dentro da programación dos Actos Castelao 2022 organizada polo Concello de Rianxo, o investigador e escritor Miguel Anxo Seixas achegarase á vila para falar da figura de Castelao nos anos 1922 e en 1947. Será no salón de actos do Auditorio Municipal e contará coa presenza, tamén, do alcalde Adolfo Muíños.

Miguel Anxo Seixas (Arzúa, 1960) é un dos historiadores da nosa terra que máis ten pescudado na traxectoria vital, política, social e artística do ilustre rianxeiro. Non só colaborou nos volumes colectivos (I e II) de Para ler a Castelao, publicados no 2000 por Galaxia, senón que é o responsábel dos tres tomos de Castelao. Construtor da nación, tamén publicados por Galaxia. Estes tomos están considerados a biografía máis completa sobre o político e escritor de cantas se teñen feito até a data, co engadido de ter sido escritas de xeito dinámico e ameno, fuxindo de esquemas que poidan facer pasada a lectura: son diarios da vida cotiá, próxima e en moitos aspectos recoñecíbel, do que foi o gran construtor da nación galega.