Lousame despide cun emotivo acto ás voluntarias turcas Ebru Karaca e Dilara Güven

O Concello de Lousame organizou unha actividade para despedir ás voluntarias turcas que estiveron colaborando estes últimos nove meses nas actividades municipais, ao abeiro do proxecto europeo Actividades interxeracionais de voluntariado. Na despedida a Ebru Karaca e Dilara Güven participaron a concelleira de Mocidade, Silvia Agrafojo, e o técnico de Voluntariado, José Manuel Outeiral.

O acto (unha cerimonia que pillou por sorpresa ás dúas voluntarias, que volven este martes ao seu país) celebrouse na noite do pasado venres no Auditorio de Lousame. Asistiron preto dun cento de persoas, entre voluntarios/as, integrantes da UNED Sénior de Lousame, do grupo O Son do Pote e do Concello de Lousame que compartiron con elas estes nove meses de traballo: punto de atención á nenez, centro de día, colexio, campamentos de verán…

Silvia Agrafojo aproveitou para agradecer “todo o esforzo que fixeron tanto Ebru como Dilara desenvolvendo actividades de carácter social e cultural que lles valeron o cariño de moitos veciños e veciñas de Lousame”. Ademais de entregarlles o diploma acreditativo da experiencia adquirida nos últimos nove meses, Agrafojo e Outeiral agasalláronas con sendas figuras de Sargadelos: unha dun faro, pola visita realizada ás illas Cíes, e outra dun gaiteiro, polo achegamento de Ebru Karaca con ese instrumento.

O Grupo o Son do Pote e as pandeireteiras da Aula Sénior da UNED quixeron colaborar poñendo a parte musical na actividade, entregándolles ás dúas voluntarias cadanseus colgantes cos seus nomes e unha ducia de cadros elaborados por un artista local das distintas actividades nas que tomaron parte Ebru e Dilara, que se mostraron moi emocionadas durante a despedida. Dilara agradeceu todas as mostras de cariño pois “foi unha sorpresa, quérovos a todos e vouvos botar moito de menos”; mentres que Ebru lles asegurou que “sodes a miña segunda familia. Espero volver no verán ou o antes posíbel”.

O Concello de Lousame lembra que é un dos poucos municipios de Galicia que xestiona programas de Voluntariado Europeo, sendo ao mesmo tempo entidade de envío como de acollida de voluntarios/as. En 2017 iniciou este camiño coa acollida de dúas voluntarias, a francesa Lucíe Rimasson e a rusa Anna Uvarova; entre 2018-2019 contaron coa colaboración da ucraína Oksana Kalinicheko e a rusa Iuliia Bautdinova; mentres que a persoa que ía participar no programa de 2020 volveu á súa terra natal xa que a súa chegada coincidiu co inicio dos meses de confinamento pola COVID-19.