Este xoves 27 de xaneiro vaise presentar no salón de plenos do Concello de Dodro o programa deportivo Dodro Saudable, un proxecto dirixido a poboación en xeral que se sustenta en tres principios básicos na análise e o diagnóstico da condición e mellora física das persoas: valoración, prescrición e seguimento.
O programa, que se presenta ás 17.00 horas, está deseñado para atender as necesidades da totalidade das persoas de Dodro, desde a infancia a vellez pasando pola adolescencia e a idade adulta, atendendo as características de cada unha delas.
O Concello apoia a posta en marcha deste proxecto na necesidade de incrementar os hábitos saudábeis a todos os niveis, uns hábitos que empeoraron coa chegada da pandemia e o confinamento: “Os datos aportados por organizacións privadas como a Gasol Fundation, e de públicas como a OMS ou a Xunta de Galicia co seu programa DAFIS, amosan un preocupante abandono da condición física que se traduce nun empeoramento da saúde persoal”.
O Concello de Dodro a través do departamento de Deportes deseñou este programa gratuíto que está a disposición de toda a veciñanza coa finalidade de mellorar a súa saúde . Poderase acudir a presentación no propio salón de plenos ou en directo por medio da canle municipal de YouTube.
