O Concello de Ribeira informa de que foi licitada unha actuación dirixida a construír un paso sobre o río Listres co obxecto de “dar continuidade á circulación tanto de vehículos como de peóns polas rúas que desembocan neste curso fluvial que marca a separación das parroquias de Castiñeiras e Aguiño”.
Así, conforme ao proxecto técnico elaborado, a obra de paso sobre o río Listres ten por obxecto dar continuidade ao tráfico rodado e peonil entre a rúa das Pedras (situada en Aguiño) e a rúa dos Paxariños (emprazada en Castiñeiras, na zona dos Areeiros).
A tal efecto vaise desmontar o paso peonil actual (que será recolocado provisionalmente augas abaixo da zona de obra e será retirado definitivamente unha vez se poña en servizo a nova infraestrutura) e no seu lugar será disposto un novo paso de formigón, erixido sobre pilotes, con beirarrúas en ambas marxes e varandas de protección lateral. A área de actuación ten unha lonxitude de 20 metros e un ancho de 9.
A actual tubaxe de abastecemento da auga será desmontada e trasladada máis abaixo. En previsión da posta en funcionamento de servizos futuros, na zona de beirarrúas vanse dispoñer tubaxes para canalización de abastecemento, alumeado e comunicacións, máis outra tubaxe de reserva.
A obra ten un orzamento de 82.292,52 euros, IVE incluído, e o prazo de execución son tres meses.
As empresa interesadas poden presentar as súas propostas ata o 25 de xaneiro á medianoite. Débeno facer a través do Sistema de Licitación Electrónica da Xunta de Galicia (SILEX).
