Catro zonas marisqueiras soben posicións na súa clasificación microbiolóxica

Ante os bos resultados obtidos nos controis periódicos, o Instituto Tecnolóxico para o Control do Medio Mariño de Galicia (INTECMAR) informou de que catro zonas de produción de moluscos bivalvos veñen de obter unha mellor clasificación microbiolóxica, “o que facilita o labor do sector”, informou o instituto dependente da Consellería do Mar.

En concreto, as análises nestas zonas de traballo revelaron de xeito continuado “unha menor presenza da bacteria E. Coli que na súa anterior clasificación”, o “que permitiu cambiar a súa catalogación mediante unha resolución publicada polo INTECMAR o pasado xoves”. As melloras supoñen que unha zona de produción marisqueira e outra de cultivo de moluscos en viveiros flotantes que tiñan clasificación B pasan a ser A, co que o recurso extraído pode ser comercializado directamente a través dun centro de expedición.

A elas engádense outras dúas zonas marisqueiras que estaban catalogadas como C e pasan a ser zona B.

“Deste xeito”, engadiu a Consellería do Mar, “o produto que antes tiña que pasar por depuración natural mediante reinstalación en batea, agora poderá comercializarse directamente previo paso por unha depuradora, o que supón a mellora da clasificación microbiolóxica para 80 bateas e nunha superficie total de arredor de catro millóns de metros cadrados de bancos marisqueiros das confrarías de Fisterra, Corcubión, Cambados, Vilanova de Arousa e Arcade”.

As zonas que pasan de estar clasificadas como B a ser zona A son a parte media da ría de Corcubión e o polígono de bateas A Pobra D, na ría de Arousa. Pasan de C a B a zona comprendida entre o tramo da estrada PO-550 que dá acceso ao porto de Tragove e a desembocadura da canle de entrada á zona de Entre Canos, na ría de Arousa, e a enseada de Larache, na ría de Vigo.