Un total de 50 centros educativos de toda Galicia desenvolverán programas de integración das familias na actividade da biblioteca escolar ao longo do curso 2021/2022. A Xunta vén de resolver a convocatoria desta nova iniciativa, Lectura e Familias, dotada con 125.000€. Na dita listaxe de medio cento de centros inclúense, pola nosa comarca, o CEIP de Escarabote (Boiro), o CEIP Plurilingüe Eusebio Lorenzo Baleirón (Dodro) e o CEIP dos Muíños (Outes). Tamén se incorporou o IES Lamas de Castelo, en Carnota.
Todos os centros participantes están integrados no Plan de Mellora Bibliotecas Escolares (PLAMBE) e solicitaron participar neste novo programa, cuxo obxectivo é, en palabras da Consellería de Cultura e Educación, “estimular o deseño e desenvolvemento de iniciativas que favorezan a participación das familias en actividades da biblioteca escolar”.
