A Xunta de Goberno Local do Concello de Boiro vén de dar luz verde ás obras para a execución dun carril bici na contorna de A Negral e rúa Salvador Allende, conectando o actual do paseo marítimo de Barraña co núcleo urbano.
O alcalde, José Ramón Romero, e a concelleira de Deportes, Dores Torrado, fixeron esta mañá a presentación das actuacións que se van levar a cabo.
As obras que se pretenden executar contemplan a creación dunha soleira de formigón de 2,4 metros de ancho e a dotación de pintura anti- esvaradiza, incluídas as marcas viais e a sinalización específica e pasos de peóns; e instalación de separadores do carril bici nas zonas de alto risco de vehículos. O orzamento total da obra é de 14.999,15 euros, e vaise executar con fondos propios mediante o remanente de tesourería.
Con esta actuación, de 420 metros lineais, pretendese a conexión do actual carril bici existente na Praia de Barraña co casco urbano de Boiro e os equipamentos deportivos existentes na zona de A Negral. “O carril bici parte do actual cara a Avenida de Compostela e comunica tamén co IES A Cachada.
Ampliar os quilómetros de carril bici e conectar con eles con puntos importantes como son instalacións municipais ou equipamentos deportivos que permitan a mobilidade urbana”, afirmou a concelleira de Deportes.
O Concello de Boiro traballa tamén para a mellora do carril bici existente no paseo marítimo de Barraña. Estanse a levar a cabo actuacións para a reparación de varios tramos deteriorados nun treito de 1.5 quilómetros que na
actualidade presenta deficiencias debido ao paso do tempo, executando unha nova soleira antideslizante e marcas viarias. “Coa creación de novos tramos de carril bici fomentamos a práctica deportiva e un estilo de vida saudable,
ademais de mellorar a mobilidade no municipio”, afirma o alcalde.
