As empresas xa poden presentar ofertas para a instalación de saneamento en Canabeiro, Oleiros

O Concello de Ribeira licitou dunha actuación destinada á instalación de saneamento con pozo de bombeo no lugar de Canabeiros, situado na parroquia ribeirense de Oleiros.

O Concello explica que a zona en cuestión carece de saneamento municipal, razón “pola cal instalarase unha tubaxe de SN4 de 315 milímetros de diámetro e 515 metros de longo máis outra por un ramal cunha lonxitude de 260 metros”.

Asemade, disporanse 21 pozos de rexistro: 14 na liña xeral e 7 no ramal.

A través destes colectores conduciranse as augas fecais por gravidade ata o punto máis baixo do trazado, onde se implantará un bombeo con dúas bombas de caudal unitario 34,92 m3/h. De aquí as augas impulsaranse a través dunha tubaxe de polietileno de alta densidade de 550 metros de longo e 90 milímetros de diámetro ata conectar coa rede xeral.

Esta iniciativa supón un investimento de 134.377,47, IVE incluído, e está adscrita ao POS+2021. O prazo de duración das obras é de catro meses.

O prazo de presentación de ofertas está aberto ata o 14 de febreiro á medianoite. Téñense que presentar a través do Sistema de Licitación Electrónica da Xunta de Galicia.