Ana Sanisidro gaña o Concurso de Poesía Urbana contra a Violencia de Xénero de Ribeira

Ana Sanisidro Lojo, moza veciña da parroquia de Aguiño, resultou a gañadora da segunda edición do Concurso de Poesía Urbana pola Igualdade e Contra a Violencia de Xénero promovido pola Consellería de Política Social a través do CIM no marco da programación polo 25-N.

Na mañá deste 14 de xaneiro a gañadora do certame, profesora de profesión, foi recibida polo alcalde Manuel Ruiz nun acto no que tamén estivo presente a concelleira Ana Barreiro para felicitala e facerlle entrega do diploma acreditativo de ter gañado o concurso, así como unha tableta.

O poema gañador chámase O amor non ata nin mata, cuxos versos foron declamados pola galardoada e que foron subidos á Rede polo Concello.

O amor non ata nin mata

Cantas mozas hai compartindo o seu tempo cun egoísta

que presume por xogar coa súa vida coma un funambulista.

Para o seu mal a atrás non bota a vista,

mais para botar en cara é todo un detallista:

“Que fas aí sentada,

TRABALLA,

ou queres ser unha mantida?”

Que, en verdade, é o que desexa

para conformarse coa crenza de que é propietario desa vida.

Buff! Non vai a ser que COÑEZA a alguén que lle mostre a

DIFERENZA

entre amor e dor.

Hipoteca a vida de quen o arrodea,

cun vago: “se me deixas mátome”; atando cunha forte cadea

con verba seca á súa doncela.

O amor vai só, sen dor;

o amor non é prohibición;

podes ir en tacóns

e con saia curta

pois non hai roupa que ao amor se axusta.

A liberdade non ten idade e o móbil e intimidade

Que non pode esixirse desde a vaidade.

A TI, SI, a ti,

FUXE, CORRE,

Que el moito roxe, por “amor” non corre.