326 propostas na enquisa participativa iniciada polo Concello de Ribeira para coñecer as necesidades das parroquias

O Concello de Ribeira fixo balance da actividade xerada ao abeiro da súa iniciativa para coñecer, vía web e de xeito participativo, as necesidades de cada unha das parroquias. O Goberno local salientou “a alta participación acadada” pola enquisa online.

Así, a veciñanza enviou un total de 326 propostas a través do formulario colgado na páxina web do concello, www.ribeira.gal, a través do cal, durante dez días, todos os cidadáns que así o quixeron puideron realizar as súas suxestións sobre as actuacións e necesidades que consideraban máis importantes a realizar en cada parroquia.

Agora, o seguinte paso por parte do Concello será analizar estas propostas e ver cales poderían encaixar no Plan de Obras e Servizos (POS 2022) que está previsto levar ao pleno no mes de febreiro (por un importe de 903.569 euros) ou noutros plans e proxectos a acometer no futuro.