A Deputación da Coruña financiará a posta en marcha de Kracia e Iceberg 360, as dúas propostas de cooperativas gañadoras do Concurso de Proxectos Cooperativistas no sector do Marketing Dixital. Uns galardóns organizados polo ente provincial e a Fundación Paideia Galiza.
O alumnado da formación “Marketing Dixital, Empregabilidade e Cooperativismo”, desenvolta nos municipios das Pontes e Boiro, estivo organizada pola Escola de Organización Industrial (EOI), a Fundación Paideia Galiza e a Deputación, coa colaboración de Ernst&Young e dos concellos mencionados, e co financiamento do Fondo Social Europeo.
Os mozos e mozas promotores de Kracia, Iceberg 360 tiveron ocasión de presentar e defender os seu proxectos de cooperativas no sector do marketing dixital tras meses recibindo clases nesta formación.
Aposta provincial polo emprendemento
Despois de deliberar, o xurado seleccionou a Kracia, de Boiro, e Iceberg 360, das Pontes, como gañadoras do concurso. Ambas propostas de cooperativas recibirán agora o apoio financeiro da Deputación da Coruña para poñerse en marcha durante este ano 2022. As achegas provinciais ascenden a 60.000 euros e inclúen o pago de salarios e gastos de constitución. Ademais, durante todo este ano, as cooperativas contarán co asesoramento da consultora internacional Ernst&Young para a xestión e o desenvolvemento comercial.
Durante o encontro, o deputado de Emprego e membro do xurado, José Ramón Rioboo, destacou que “as persoas emprendedoras e empresarias son o motor de desenvolvemento económico desta provincia. Son todos eles e elas os que xeran novos postos de traballo, modernizan o noso tecido empresarial e, en definitiva, contribúen ao benestar da cidadanía e ao progreso económico.”
Unha vez máis, a Deputación presta o seu apoio a un dos colectivos máis vulnerables do mercado laboral, a mocidade, ofrecéndolles as ferramentas necesarias para que se formen nun campo con amplas perspectivas laborais como é o marketing dixital e sempre fomentando a economía social, impulsando a creación de novas cooperativas.
