A ARE recupera a súa actividade estes días logo da parada motivada pola COVID-19

A Asociación Rianxeira de Empresarios (ARE) anunciou a súa intención de recuperar a plena actividade estes días logo da parada obrigatoria motivada pola COVID-19 e, máis en concreto, por un contaxio no seo da asociación. Este mércores, sen ir máis lonxe, a ruleta de Nadal estará en Taragoña, no Campo de Pazos, en horario de 17.00 a 20.00 horas. Trátase dunha actividade que se ben estaba programada para o martes 4 de xaneiro, tivo que ser adiada tras ter coñecemento dun contacto directo cun positivo por parte do persoal da ARE.

A decisión de suspender a actividade tomouse “desde a responsabilidade ante a situación actual e pensando no ben de tódolos veciños”, sinala a patronal nun comunicado, engadindo que “días despois confirmouse o positivo por COVID do noso persoal, motivo polo cal nos alegra ter acertado coa nosa decisión”.

A ARE lembra tamén a todos aqueles veciños que teñan vales para a ruleta, que “a deste mércores 19 de xaneiro é a última oportunidade para participar”, polo que a patronal roga aos que xa participaron “que garden os seus vales para o sorteo final e permitan a participación no xogo da ruleta daqueles que aínda non o fixeron”.

O sorteo final realizarase finalmente o venres 21. Os números premiados publicaranse en www.are.gal e nas redes sociais da asociación, que explica que “é importante ter en conta que xunto coa listaxe dos números gañadores publicase unha relación de números suplentes”. Isto débese a que os vales para a ruleta que obtiveran premio quedan invalidados para o sorteo final. Por este motivo, a ARE prega que “todos os que teñan números da lista, gañadores ou suplentes, contacten coa asociación”.

Con respecto aos gañadores da campaña online da Federación Comercio Rías Baixas na que está adherida a ARE e na que participaron tódolos seus asociados, a asociación pide desculpas “polo atraso en contactar con eles e confirmarlles que nos vindeiros días recibirán a nosa chamada para que poidan pasar a recoller o seu premio o antes posíbel”.

Así mesmo a patronal rianxeira informou de que nos vindeiros días retomará a súa actividade “con algunhas novidades” e que “en breve faremos público o calendario de actividades para os primeiros meses do ano”.