A Asociación Vai de Roda vai ofrecer este domingo 19 de decembro unha das grandes citas festivas da tempada no concello rianxeiro: o seu Festival de Nadal. Será ás 18.00 horas no Auditorio de Rianxo. A reserva de entradas pode facerse a través do correo vaiderodarianxo@gmail.com ou no teléfono 698133962. Será novamente unha cita coa música e o baile tradicional da nosa terra.
Vai de Roda, para quen non o saiba, é unha asociación xurdida hai case dúas décadas para “promover e divulgar a música e o baile tradicional galego, así como todas aquelas formas de expresión que estes leven asociados (tecidos, vestimentas, costumes…)”. Ao seu abeiro impulsouse unha escola de música e baile tradicional que é xa un referente no Barbanza e Galicia no ámbito formativo e dinamizador. Este legado divulgador e dinamizador é unha das claves dos seus festivais, entre os que se atopa o de Nadal.
