Unha cea do Nadal de médicos residentes agrava un brote de covid con 26 contaxios do Hospital de Santiago

Aínda que os contaxios comezaron no servizo de Anestesia a primeiros de mes, en tan só dúas xornadas confirmáronse 11 casos tras unha festa á que acudiron 120 médicos residentes.


O Hospital Clínico de Santiago de Compostela (CHUS) comezou a realizar un cribado a todos os seus médicos residentes tras o brote de covid que afecta xa a 26 profesionais deste centro e que, aínda que se iniciaba no servizo de Anestesia a primeiros deste mes de decembro, viuse agravado por unha festa á que o pasado 7 de decembro asistiron uns 120 médicos residentes nun coñecido restaurante da capital de Galicia.
Unha cea que, segundo informan fontes da área sanitaria de Santiago-Barbanza, descoñecía a dirección do hospital e que xerarían, de momento, 11 contaxios detectados nos dous últimos días, entre quen, aínda sendo contacto estreito dos primeiros casos detectados, acudiron á citada festa.

MENSAXE DA XEFA DE MEDICINA PREVENTIVA

O que conlevou as críticas da xefa do servizo de medicina Preventiva do CHUS que nun escrito remitido aos xefes de servizo pregúntase “Como podemos esperar responsabilidade por parte da poboación xeral se o persoal sanitario con maior formación non cumpre sequera a recomendación de limitación social e de mobilidade para os contactos estreitos de risco?”, para concluír que “Desgraciadamente será o sistema sanitario -e a sociedade no seu conxunto- o que absorba o custo destes comportamentos de risco, que xerarán baixas prolongadas en período crítico, como o que iniciamos, e centos de probas diagnósticas custosas; por non falar do evidente risco sanitario destes comportamentos”.

E todo isto a pesar das advertencias realizadas desde a Dirección do centro sanitario compostelán para que se evitasen este tipo de festas con asistencia masiva, facilitando que se propagou un brote “polo incumprimento da indicación de precaucións dos contactos estreitos, que están exentos de corentena estrita pero non de limitación de mobilidade e vida social”.